มากินหมกปลาเซียมนำกานพี่น้อง
อาทิตย์ที่แล้วได่เมือบ้านก่าสินธุ์ เลยลงไปซื่อปลายูท่าปลาบ้านนาสีนวล-โสกทราย ขื่นจากเรือมาใหม่ๆกะได่ปลาเซียม(ปลาเนื้ออ่อน)มาโลสี่ขีด โตบ่ใหย่ปานได๋โลละร้อยรุ่นใหย่ๆสองสามโตโลกะโลละสองสามร้อย
กับได่ปลาหนังมาอีกโลหกขีด ปลาหนังโลละ ๗๐ บาท(ปลาหนังคือปลาบ่มีเกล็ดมีปลากด ปลาแขยง ปลาหลด ปลาหลาด ปลาหมู ปลาเซียมน้อย ฯลฯ)
กะเลยเลือกปลาเซียมน้อยจากกะมังปลาหนังออกมา กะได่หลายเติบยูบ่ได่กินหมกปลาเซียมมาโดนแล้ว
เลยจัดการตำกระเทียม พริกสด ตำพอเปลๆบ่ต้องแหลกหลาย ตะไคร้สิหั่นบางๆหรือสิตำนำกันกะได่ ใส่เกลือนำนิดหน่อย
หอมหัวแดงสิหั่นหรือสิทุบเอากะได่ มีหอมต้นกะใส่นำอีก เติมน้ำปลา ผงนัว และน้ำปลาแดก(น้ำปลาร้า)นำตามสูตรอิสานบ้านเฮา
สิ่งที่ขาดบ่ได่เวลาหมกปลาบ้านเฮากะคือ ผักอิตู คนให่ทั่วให่เข่ากันเทิงปลาเทิงเครือง
ก่อนหมกกะตัดใบตองกล้วยมาลนไฟให่ใบตองอ่อนก่อน(กันใบตองแตก)
จัดการย่างเทิงเตาถ่าน ก๋าว่าให้ไหม้ใบตองชั่นแรกเทิงสองด้าน
เปิดออกหอมฮวยๆ หอมผักอิตู
มาๆพี่น้องเทือนี่ ซีมได่แล้ว แซบคักๆเข่าเทียงมื้อนี่โดนๆได่กินเทือกะกินให่มันแซบๆคักๆโลด
ไม่มีความคิดเห็น:
แสดงความคิดเห็น